Рэспубліка Беларусь мае багатую гісторыка-культурную спадчыну і ўнікальны патэнцыял, неабходны для паспяховага развіцця турызму. 7 жніўня 2023 г. Пастановай Міністэрства спорту і турызму Рэспублікі Беларусь №36 «Аб вядзенні Адзінай класіфікацыі відаў турызму ў Рэспубліцы Беларусь» быў вызначаны пералік з 13-ці асноўных відаў турызму. Па ініцыятыве Міністэрства спорту і турызму працягваецца практыка, якая добра зарэкамендавала сябе, прысвячаць кожны месяц пэўнаму віду:
студзень - месяц рэлігійнага турызму;
люты - месяц лячэбна-аздараўленчага і медыцынскага турызму;
сакавік - месяц прамысловага турызму;
красавік - месяц дзелавога турызму;
май - месяц аграэкатурызму;
чэрвень - месяц гісторыка-культурнага турызму;
ліпень - месяц актыўнага турызму;
жнівень - месяц падзейнага турызму;
верасень - месяц экалагічнага турызму;
кастрычнік - месяц адукацыйнага турызму;
лістапад - месяц паляўнічага турызму;
снежань - месяц гастранамічнага турызму.
Традыцыйна, у рамках месячнікаў па ўсёй краіне праходзяць тэматычныя адукацыйныя семінары, прэс-канферэнцыі, круглыя сталы, майстар-класы, экскурсіі і іншыя мерапрыемствы, накіраваныя на папулярызацыю пэўнага віду турызму (пра кожны – чытайце на нашых старонках).
Студзень - час рэлігійнага турызму
Месяц, калі хочацца запаволіцца, прыслухацца да сябе і дакрануцца да духоўнай спадчыны краіны. У гэты час па ўсёй Беларусі праходзяць мерапрыемствы, якія знаёмяць з культурай, гісторыяй і традыцыямі розных канфесій. Беларусь - дзіўнае месца, дзе стагоддзямі побач існавалі праваслаўе, каталіцызм, юдаізм і іншыя рэлігіі. Храмы, манастыры і святыя месцы тут - жывыя сведкі гісторыі, напоўненыя сэнсам і асаблівай атмасферай. Рэлігійны турызм - гэта больш, чым паездка. Гэта шлях да ўнутранага дыялогу, падарожжа да святыняў, цікавасць да традыцый і архітэктуры, жаданне адчуць сувязь часоў. Хтосьці адпраўляецца ў такое вандраванне па клічы веры, хтосьці - з цікаўнасці, а хтосьці - у пошуку натхнення і гармоніі.
Сёння ў турыстычныя маршруты Беларусі ўключана каля 1400 рэлігійных аб'ектаў: ад велічных сабораў і манастыроў да ўтульных сельскіх цэркваў. Больш за ўсё іх у Гродзенскай і Брэсцкай абласцях, але ўнікальныя месцы ёсць у кожным рэгіёне краіны.
Што раім ўбачыць у студзені? Спаса-Праабражэнскую царкву і Сафійскі сабор у Полацку, Брыса-Глебскую (Каложскую) царкву ў Гродне, Свята-Мікольскі жаночы манастыр у Магілёве, храмы абароннага тыпу ў Камаі, Мурованцы і Сынкавічах, драўляныя цэрквы Палесся… Многія з гэтых аб'ектаў ужо ўключаны ў папярэдні Спіс сусветнай спадчыны ЮНЕСКА — і гэта яшчэ адна нагода ўбачыць іх на свае вочы. Студзень праходзіць насычана: прэс-канферэнцыі, фестывалі, семінары, экскурсіі, выязныя туры і нават зімовыя купанні – робіцца ўсё, каб па-новаму раскрыць Беларусь, прыцягнуць увагу турыстаў і паказаць, наколькі багаты і шматгранны яе духоўны ландшафт.
ТОП-7 самых прыгожых праваслаўных храмаў Гомельскай вобласці
Кафедральны сабор Святога Міхала Арханёла ў г.Мазыры з'яўляецца галоўным праваслаўным храмам Тураўскай епархіі. Спачатку гэта быў касцёл, які збудавалі ў сярэдзіне XVIII стагоддзя. А амаль праз сто гадоў яго перадалі праваслаўнай царкве і асвяцілі ў гонар Святога Архістратыга Міхаіла. Яшчэ праз стагоддзе - стаў турмой НКУС. Цяпер у саборы знаходзіцца адзіны ў Рэспубліцы храм-музей палітычных рэпрэсій.
Храм Святой Жываначальнай Тройцы ў г.Жлобіне пабудаваны ў канцы XIX стагоддзя і быў поўнасцю знішчаны падчас Вялікай Айчыннай вайны. Нанова адбудаваны ў канцы мінулага стагоддзі. Пры царкве дзейнічае іканапісная школа.
Кафедральны сабор свяціцеляў Кірылы і Лаўрэнція Тураўскіх у г. Тураве. Будаўніцтва комплексу завяршылася крыху больш за 10 гадоў таму. У XII стагоддзі на гэтым месцы знаходзіўся каменны сабор, да падмурка разбураны землятрусам. Сабор дапаўняюць капліца і званіца ў два ярусы.
Храм Прэабражэння Гасподняга ў г.Светлагорску – малады храм з залатымі купаламі, трыма пасадамі і багатым унутраным убраннем пабудаваны ў форме крыжа. У храме знаходзяцца ўнікальныя іконы і святыя мошчы Опцінскіх старцаў.
Свята-Успенскі сабор у г.Рэчыцы быў пабудаваны прыкладна ў сярэдзіне XIX стагоддзя. Але па завяршэнні будаўніцтва абвалілася званіца, якую аднавілі толькі праз 30 гадоў. У савецкі час у саборы размяшчаўся дом культуры і толькі ў 2000-х храм вярнуўся ва ўлонне праваслаўя.
Храм прападобнага Мікіты Спавядальніка ў аг.Пакалюбічы, Гомельскага раёна. Служэнні ў царкве пачаліся ў 1811 годзе. Існуе дзве займальныя легенды асвячэння храма, у будаўніцтве якога ўдзельнічаў святы Ян Кранштацкі. У храме знаходзяцца ўнікальныя іконы.
Сабор Святых Пятра і Паўла ў г.Гомелі пабудаваны напачатку XIX стагоддзя англійскім архітэктарам па просьбе графа Румянцава. У савецкі час храм служыў планетарыем. Сабор зноў стаў дзейсным у 1989 годзе. Ён захоўвае часціцы мошчаў святых.
